Es esch de 04.02.2023, 19:30. Obs windet oder stürmt, Schminki sitzt und Frisur hed au jede höbsch ahgmolet. Mit grosser Freud semmer denn ufs Fäschtgländ gloffe, ond hend eus scho gfroget was Teemöcke das Jahr weder ah Deko bütet. Di einte send inegstürmt zom luege ond anderi hend en trochnige Hals gha. Zom guete Glöck heds gad en Barwaage gha wo LUZione verkauft hed…..gad no Schwein gha. Nachdem mer das Problem besiitiged hend, müesstemer no was mache gege eusi akuti Underhopfig. Meteme gschmierete Hals ond em Bier i de Hand, hemmers denne au id Halle gschaft.
Eifach nome WOW! Was Teemöcke das Johr ufgstellt hend, esch eifach Grandios. Met riesige Burge, Schlossmuure mit Efeu öberwachse, bis hin zomene riesige Drache, esch also alles debii gsi. Chum usem Stuune usecho, hemmer ois denn scho dörfe go parat mache för euse Uftritt. Aber dete hemmer d’Rechnig ohni de Torwächter vom Gugge-Ihgang gmacht. Ob Bierbecher, Luzglas oder Wasserbecher, be ehm gids keis verbiicho. Die wos den glich gschafft händ, hetter denn eifach nömme inegloh. Trotz allne Hürde ond Schwirigkeite hends de doch alli no rechtziitig an Uftritt gschaft.
Im wohlbeheitzte Ossezelt hemmer eusi musikalischi Siite dörfe zeige. Top Stimmig, kuuli Lüüt ond en sehr solide Uftritt send en gueti Mischig für es guets Fescht. De Spass am musiziere, ond met Kollege was onderneh, het mer dütlich gmerkt wärendem spile. Was sech au uf die Zuelosende öbertreit het. Esch en (Ich weiss ich wiederhole mich) super Uftritt gsi, ond es hed mega Spass gmacht.
Nachem Uftrritt hemmer eus denn nomal dörfe am Torwächter verbiikämpfe, zom oisi heissgloffene Instrument abzküehle ond verrume. Nachere kurze Ahsproch vo eusem Tambi Simon, hemmer eus weder um eusi Underhopfig und trochne Häls kümmeret. Au wiiteri Darbietige vo andere Guggemusige hemmer dörfe ahlose ond gnüsse.
So hemmer de Obe dörfe usklinge loh. Es isch langsam aber secher früeh worde, ond d`WSF sind hei. Di einte send gloffe ond hend dörfe Deko mit hei näh, anderi hend ime ned AMAG-Luxusschlitte dörfe Hei gfloge werde.
Nacheme AntiKaterFondue hends den au alli vo eus is Bettli gschafft zom sech erhole ond neui Kräft tanke förs kommende Weekend.
Giggedi
