Am Mentig simmier am 10:30 mit em Car uf Eisidle greist und hend dete en traumhafte Tag dörfe erläbe. Agfange bem absolut fantastisch schöne und warme früehligswätter. Wo mier acho sind hemmer zerscht emal alles usglade und sind denn inkl. allne Instrument uf direktem Wäg richtig Chlosterplatzgloffe. Det hämmer denn zimmli grad mal die viele Lüt met eusere Musig begrüesst. Heiss eschs gsi !!! Es esch en super uftritt gsi und het unändlich spass gmacht. Aschlüssend hets es chlises Päuseli geh womier för euses libliche wohl hend chönne sorge und d Sunne gnüsse !
Am 14:00 eschs den los gange metem Umzug. Es het sehr vell lüt gha wo all die kreative Wäge und diverse Gugge sind cho luege/lose. De Umzug esch ganz andersch gsi wie anderi. En Umzug dur die verschiedene Gässli und Strössli vo Eisidle. Eifach nume schön !
Aschlüssend hämmier nachere erneute Pause zäme met de Seifesüder es chlises Platzkonzertli geh. Mier hend abwächsligswis jewils 1 Stück gspiellt und eus gägesitig gfiiret! Au be de Lüt esches guet acho, s hät ämel so usgseh 😜 ! Es het uh freud gmacht und esch au mal e chli e abwächslig gsi zu de gwohnte Uftritt wo mier susch hend. Wo mier eus den langsam wieder uf de Ufewäggmacht hend het euses Rhythmusregister d Gässli und d Zueschauer na met diverese Rhythmene begeisteret.
Als letschts hämmer namal imene andere Gässli zum Abschluss 3-4 lieder gspillt bevor den de Car ca. am 19:00 witerdüüsed esch för uf Wil AG.
Es esch en uh lange Tag gsi bes det here aber trotzdem simmer motiviert gsi euses Chönne au na in Wil AG dörfe zeige. Det acho hemmer den aber nachli Ziit gha för eus. Chli schwätze, öpis ässe und was mer halt so macht a somne Fäscht! 😉
23:30 esch den au euse letschti Uftrett los gange womer eifach namal alles geh händ !
S Zält het bebt und d Lüt händs unglaublich gfiiret! Die Stimmig i dem Zält esch unbeschrieblich gsi. Mier händ abglieferet und all hend e riesigi Freud gha. Am 01:00 esch denn de Car zrugg uf Untersiggetal gfahre und mier sind alli völlig zfriede aber au übermüedet vo de ganze letschte Fasnachtstäg heigreist.
DANKE liebi WSF’ler, schön wars und bis zum negste ! 😉
