Es isch so wiit, nachere lange Nacht ade Badener Gugge Nacht, ghats wiiter in Bade
Am Mittag hämmer eus wieder troffe in Bade, zum am halbi zwei d‘Lüüt uf em Schlossbergplatz ii z’wärme bevor de Umzug los gange isch
Nach dem Uftritt sind sicher fast alli wieder wach und ready gsi zum wiiter mache.
Am zwei isch denn de Umzug los gange und mit de Nummer 35 sind mir gestartet…
Wie immer farbefroh und mit viel Konfetti hämmer de Marsch gmeisteret..
Es hät richtig Spass gmacht für all die Lüüt zspiele, wo cho sind go lose..
Nach em Umzug Hämmer wie immer es Würstli mit Brot becho.. Es sind glaub alli froh gsi, dass sie nomal e chlini Pause händ defe mache.. sind au strängi Täg
Nach de Pause sind mir traditionell mit em Rhythmus duur d‘Altstadt gloffe bis zur Bühne, wo eusi Trümmeler en Uftritt gmacht händ und alli ihri geile Stück gspielt händ.. Natürlich ischs nöd lang gange, hät sich de Platz gfüllt
Churz druf abe isch denn au scho s‘Monsterkonzert losgange, wo paar vereinzelti mitgemacht händ..
Ab dänn hämmer nomal chli Ziit gha, zum anderi Guggene zlose und altbekannti Fasnächtler zträffe..
Churz vor de Sächsi händ mir nomal defe zeige in Bade, was mir chönd, au wenn de eint oder ander Aasatz scho chli glitte hät
Instrument hämmer verlade und händ eus uf de Wäg gmacht is Restaurant „Zur Brugg“, wo mir immer euses Vereinsesse händ… Und wie immer isch es meega guet gsi und alli händs feine Ässe gnosse und mir händ chöne gmüetlich zämme hocke und Ziit verbringe..
Aaschlüssend isch es denn wiiter gange zu de Schnüfflerparty, deet no eis go spiele,
bevor mir denn eus uufglöst händ. Es paar sind no blibe und die andere sind heigange go schlaf nahhole ;)
En erfolgriiche Tag isch zänd gangä
Und bin mir 100% sicher, es freued sich alli scho uf de nächst „Gig“
