Fasi Fritig het gstartet! Trotz mässigem Wetter gohts mit em Car in bester Stimmig nach Laufeburg. Chum acho wird denne de Zwätschgetöff rächt igheizt da mer nochli früeh dra sind. Aber Achtung! Mer spelled denne no gell 😊
Zu denne drü Sousaphoniste wo in Untersiggenthal in Car igstege sind, gsellt sich de lädierti Mäse dezue! Jetzt hemmer scho zwei wo uf de Bühni wo es Hockerli bruched. Mer spelled denne au grad zur Eröffnig vom Fest und legged en grandiose Uftakt ane.
Mit Zwätschgetöff, eim Rollstuehl, 2 WSFler a Stöck und en ganz en Huufe anderi WSFler verschiebemer uf di Dütschii Siite vo Laufeburg zum d Instrument schomol för de spöteri Uftritt z platziere.
Im Restaurant Pizzeria Castillo hemer no hüt churzfristig chöne reserviere zum go Znacht esse. Gfühlt en halbe Marathon isches zwar gange um das Resti zfinde, aber gfunde hemmers uf jede Fall. 2 Stund spöter hend dene alli öppis zwüsche de Zäh gha, au wenn di einte usere Pizza Schachtle hend müsse esse anstatt eme Teller. Eb im Resti Teller usgange sind oder ebs Angst gha hend, dass die paar WSFler de Teller zerbreche würde isch noni abschlüssend klärt.
Direkt us de Ferie stossed euses letschte Sousi und di letscht Trompete zu eus und mer fätzed fasch komplett es Surprise Konzert uf de Dütsche Siite ane.
Mit chli verspötig spelled mer no es letschts Mol am 00:45. Isch denne au de letschti Uftritt uf dere Bühni. D Melody het Gebori und wies sich ghört werd gsunge för sie. De Speaker isch denne uf di glorichi Idee cho, dass s Gebori Chind es Lied dirigiere chönt. Fear of the Dark dirigiert d Melodie mit bravour während sich de Tambi för einisch bi de erste Trompete ihreiht. Usgezeichnet gmacht Melody!
Verladet und scho wieder sind mer ufem Heiweg. Z Untersiggenthal acho hend es paar WSFler noni gnueg und tobet sich bi de Party vo de Räbefoniker us. Eb alli weder fit und munter parat stönd för de Umzug z Untersiggethal gsehmer denne im nächste Bricht 😊
