Alle Jahre wieder aber eifach immerna es Highlight
Euse obligati Fasnachtssamstig hed mitem Chinderumzug in Untersiggenthal agfange. Am Treffpunkt bim Ahänger hed mer aber denn scho gmerkt, dass de eint oder ander en seeeehr churzi Nacht gha hed, d Sunnebrülle sind montiert gsi oder aber fürs schminke chli weniger Müeh geh.
Vor zahlriich erschinene Bsuecher händ mir dörfe de Chinderumzug erläbe. S Wetter hed glaub sin Teil au dezue bitreit. Nach eusem Fotoshooting fürs Gruppeföteli und de Verpflegig händ mir vorem Schuelhuus no en churze Uftritt higleit.
Aber hmmm… irgendwie verfolgt eus öpper? Isch agleit gsi wie de Ned Flanders vo de Serie „The Simpsons“ …es paarne sind denn plötzli d Schueh und d Gangart ufgfalle. Ja liebe Buzz (euses Ehremitglied und langjährige Präsident) mir hend di erkennt. Bis mir denn am Chinderball händ dörfe spiele, isch d Ziit mit sünnele, Bekannte rede oder Gschicklichkeitsspiel verbrocht worde.
De Chinderball isch guet bsuecht gsi und mir händ eus nomol ganz fescht Müeh geh zum de Kids en Freud z bereite… aber Achtung.. d Kids hend au ganz vill Freud a Konfetti, gäll Adi und Giger J Si zwei sind chli am falsche Ort gstande und hend chli vill vo dene farbige Fasnachtsaccesoires becho.
Sooo jetzt hämmer eus en Pause verdient und sind mit grossem Hunger is Restaurant Löwen.
Zum Glück hämmer euses Esse vorbstellt, drum händ eusi Raubtier nid lang uf ihres Esse müesse warte. Mit singe, schnupfe, Spieli spiele, …. händ mir eus d Ziit vertriebe bis mir eus denn uf Baden gmacht hend.
Badener Gugge Nacht (BAGUNA) isch für eus ein Muss. Bim Uslade vo de Instrument und, ganz wichtig für hüt Obig, em Zwätschge Töff hed mer scho gmerkt, dass sich alli uf de Obig freued.
Super Wätter, nid allzu chalt, villi Bsuecher und natürli Guggesound, sooo chan mer d Fasnacht am Beschte gnüsse. Dur vier bravuröse Uftritt isch d Stimmig vo de Mitglieder immer besser und besser worde, mängisch sogar scho chli z guet. So dass de Studi plötzli gmeint hed er müessi sini Posune im Brunne go bädele oder d Melody wo sich vorem Ilade hed welle drucke und sich im Sousaphonbag versteckt hed…. Aber ihre Plan isch nid so ganz ufgange, mer hend si denn eifach mitem Bag zäme in Anhänger mitiglade J Alles in allem esches en glungne Tag gsi met vell Spass und guete Uftritt. Euse Fasi-Samschtig old but gold.
Melody & Sandra
